ចេញផ្សាយថ្ងៃសុក្រទី៣១ ខែមករា ឆ្នាំ២០២៥
បាត់ដំបង៖ កម្លាំងមូលដ្ឋានកងរាជអាវុធហត្ថស្រុកកំរៀង បានចាប់ខ្លួនជនត្រូវចោទ០១នាក់ តាមដីកាបង្គាប់អោយចាប់ខ្លួនរបស់សាលាដំបូងខេត្តបាត់ដំបង ពីបទជួញដូរដោយខុសច្បាប់នូវសារធាតុញៀ។
កិច្ចប្រតិបត្តិការខាងលើនេះធ្វើឡើងនៅវេលាម៉ោង០៨ និង៣០នាទី ថ្ងៃទី២៩ ខែមករា ឆ្នាំ២០២៥ នៅចំណុចភូមិកំប្រង់ ឃុំតាក្រី ស្រុកកំរៀង ខេត្តបាត់ដំបង ដោយបានឃាត់ខ្លួនជនត្រូវចោទម្នាក់ ឈ្មោះ ហម រ៉ា ភេទប្រុស អាយុ៤៣ឆ្នាំ មុខរបរយោធា រស់នៅភូមិគគីរ ឃុំពេជ្រចិន្តា ស្រុកភ្នំព្រឹក ខេត្តបាត់ដំបង តាមដីកាបង្គាប់ឱ្យនាំខ្លួនលេខ ៥៦តព្រ/២៥ ចុះថ្ងៃទី ២៨ ខែមករា ឆ្នាំ២០២៥ របស់លោកស្រី នុត សុម៉ារី ចៅក្រមស៊ើបសួរនៃសាលាដំបូងខេត្តបាត់ដំបង ពីបទជួញដូរដោយខុសច្បាប់នូវសារធាតុញៀន (ស្ថានទម្ងន់ទោស បរិមាណគ្រឿងញៀនច្រើនលើសលប់) ប្រព្រឹត្តនៅចំណុចភូមិសាស្រ្តខេត្តបាត់ដំបង,ខេត្តកំពង់ស្ពឺ,រាជធានីភ្នំពេញ និងក្នុងទឹកដីប្រទេសថៃ កាលពីអំឡុងឆ្នាំ២០២៣ រហូតដល់ថ្ងៃទី ២២ ខែមករា ឆ្នាំ២០២៥។
ជាមួយការឃាត់ខ្លួនជនត្រូវចោទខាងលើ សមត្ថកិច្ចជំនាញបានដកហូតវត្ថុតាង ,ទុសសៀ០១ មានបង់០៣ និងគ្រាប់ចំនួន៩០គ្រាប់ ,ទូរស័ព្ទដៃចំនួន ០២គ្រឿង ។
បច្ចុប្បន្នជនត្រូវចោទកំពុងឃាត់ខ្លួននៅការិយាល័យជំនាញដើម្បីចាត់ការតាមនីតិវិធី៕
